Մեր առաքելությունն է վառ պահել պատմական հիշողությունը, ճանաչել մեր պատմական հայրենիքը, որն այժմ սփռված է Հայաստանի, Արևմտյան Հայաստանի (Թուրքիայի), Կիլիկիայի, Իրանի (Պարսկահայքի) տարածքով: Մեր առաքելությունն է նաև բացահայտել հայկական և համամարդկային մշակութային արժեքներ, որ գտնվում են Իսրայելում (Երուսաղեմում) և Եվրոպայում (Վենետիկ, Սուրբ Ղազար, Հռոմ, Վիեննա): Մեր հիմնական տուրերի աշխարհագրությունը մի տարածք է ընդգրկում, ուր հայ ժողովուրդն ապրել է հազարավոր տարիներ և ստեղծել փառահեղ մշակույթ:

Եվրոպայի և Ասիայի այս խաչմերուկում բախվել և բարգավաճել են համաշխարհային պատմության ընթացքը որոշող քաղաքակրթություններ և ժողովուրդներ. ասորիներ, պարթևներ, հայեր, հռոմեացիներ, բյուզանդացիներ, արաբներ, մոնղոլներ, թյուրքեր և ռուսներ: Այս խաչմերուկը եղել է անհանդուրժողականության ինչպես նաև ներդաշնակության կենտրոն տարբեր կրոնների. հելլենիզմի, զրադաշտության, քրիստոնեության և իսլամի: Որոշ գիտնականների պնդմամբ այստեղ էր գտնվում Եդեմի այգին, ուր Աստված արարեց Ադամին ու Եվային: Այստեղ են գտնվում Բիբլիական Արարատ, առասպելական Եփրատ, Արածանի, Տիգրիս, հեքիաթային Կապադովկիա, հրաշագեղ Վանա լիճ և Ուրմիա լիճ, Սիփան սար և Նեմրութ լեռ, Մշո դաշտ և Թոնդրակ հրաբուխ: Այստեղ են փառահեղ ճարտարապետության վկա քաղաքներ, վանքեր, բերդեր:

Նման տուրեր իրականացնելիս մենք առաջնորդվել ենք հոգեհարազատ և հայրենանվեր գործով զբաղվելու ցանկությամբ: Ուղևորություների ընթացքում մենք ինքներս անընդհատ սովորում ենք. մեր այցելած վայրերը` քաղաքներ և գյուղեր, դաշտեր և լեռներ, վանքեր և բերդեր, բացահայտում են անցյալը և ստիպում են խորհել ապագայի մասին: Տուրերի ընթացքում սովորելով ինքներս` մենք հնարավորություն ենք ստեղծում, որպեսզի սովորեն նաև մեր ուղևորները, մեր կարգախոսն է “ճանաչել ավելին…”: Պատահական չէ մեր ընկերության խորհրդանիշը` արագիլ, մի ազնիվ թռչուն, որ միշտ վերադառնում է իր հայրենիք:

Ընտրե՛ք մեր տուրերը և տեսեք, թե որքան գեղեցիկ է մեր մշակույթը, մեր "էրգիրն" ու այնտեղ թողած մեր ժառանգությունը, գնահատե՛ք մեր այսօրվա պետությունը և ձգտեք ունենալ ավելին...